მამუკა ბახტაძე: ღრმად მწამს, საქართველო სოფლის მეურნეობის პროდუქციის ერთ-ერთი ყველაზე წარმატებული ექსპორტიორი ქვეყანა გახდება
„ღრმად მწამს, საქართველო სოფლის მეურნეობის პროდუქციის ერთ-ერთი ყველაზე წარმატებული ექსპორტიორი ქვეყანა გახდება“, – ამის შესახებ პრემიერ-მინისტრმა მამუკა ბახტაძემ ზუგდიდში, აგროსაინვესტიციო ბიზნესფორუმის გახსნაზე განაცხადა.
მისასალმებელ სიტყვაში პრემიერმა სოფლის მეურნეობის მნიშვნელობაზე ისაუბრა.
„ასეთი ფორმატი – აგროსაინვესტიციო ბიზნესფორუმი, რომლის ფარგლებშიც დღეს შევიკრიბეთ, არის ძალიან მნიშვნელოვანი წინაპირობა იმისთვის, რომ ჩვენ მეტი შევძლოთ სოფლის მეურნეობაში. მახსოვს, როდესაც სოფლის მეურნეობაში ჩვენს პროგრამებს ვიწყებდით, ვისმენდით ძალიან ბევრ უსაფუძვლო კრიტიკას: რომ ეს ყველაფერი წყალში გადაყრილი ფული იქნებოდა, რომ სახელმწიფოს მხრიდან მსგავსი ინვესტიციები არ იყო გამართლებული, რომ საქართველოში სოფლის მეურნეობას არ ჰქონდა პერსპექტივა. დარწმუნებული ვარ, ეს სიტყვები თქვენც კარგად გახსოვთ. ბუნებრივია, შედეგმა აჩვენა, რომ ჩვენ მართალი ვიყავით. მინდა ყველას შეგახსენოთ, რომ რამდენიმე წლის წინ, სოფლის მეურნეობის პროდუქციაში სავაჭრო დეფიციტი დაახლოებით 900 მილიონი გვქონდა. დღეის მდგომარეობით, დეფიციტი შეადგენს 300 მილიონს. ერთობლივი ძალისხმევით, შევძელით, ეს დეფიციტი სამჯერ შეგვემცირებინა. მე ღრმად მწამს, რომ შევძლებთ არა მხოლოდ იმპორტის ჩანაცვლებას, არამედ საქართველო სოფლის მეურნეობის პროდუქციის ერთ-ერთი ყველაზე წარმატებული ექსპორტიორი ქვეყანა გახდება“, – განაცხადა ბახტაძემ.
