ბათუმის აქციის ორგანიზებაში ბრალდებულთა სასამართლო პროცესზე დღეს განაჩენი გამოცხადდება
11 – 12 მარტის ბათუმის აქციის ორგანიზებაში ბრალდებულთა სასამართლო პროცესზე დღეს მოსამართლე დავით მამისეიშვილი განაჩენს გამოაცხადებს. სასამართლო სხდომა 15:00 საათზე გაიმართება.
ირაკლი ჩხვირკია და მერაბ ღოღობერიძე აპრილის თვეში დააკავეს. ბრალდების მხარე მათ ჯგუფური ძალადობის ორგანიზების და ხელმძღვანელობას ედავება. მათ ბრალი საქართველოს სისხლის სამართლის კოდექსის 225-ე მუხლის პირველი ნაწილით აქვთ წარდგენილი, რაც თავისუფლების აღკვეთას ექვსიდან ცხრა წლამდე ვადით ითვალისწინებს. ჩხვირკია და ღოღობერიძე ბრალს და ერთმანეთთან რაიმე კავშირს არ აღიარებენ.
დაცვის მხარე იმედოვნებს, რომ სასამართლო გამამართლებელ განაჩენს გამოიტანს, ადვოკატ პაატა შავაძის თქმით, რომელიც ბრალდებულ მერაბ ღოღობერიძის უფლებებს იცავს, ბრალდების მხარემ ვერ შეძლო გადაელახა ისეთი მაღალი სტანდარტი, როგორიც არის გონივრულ ეჭვს მიღმა:
“გამოკვლეული მტკიცებულებების შედეგად ბრალდების მხარემ ვერ შეძლო გადაელახა ისეთი მაღალი სტანდარტი, როგორიც არის გონივრულ ეჭვს მიმა და დაცვის მხარეს გვაქვს გონივრული მოლოდინი, რომ აუცილებლად უნდა დადგეს გამამართლებელი განაჩენები, როგორც ერთი ასევე მეორე ბრალდებულის მიმართ,” – განაცხადა ადვოკატმა პაატა შავაძემ.
