ვისოლ ჯგუფმა საქართველოს ბაზარზე ბერძნული Eko დააბრუნა

ვისოლ ჯგუფმა საქართველოს ბაზარზე ბერძნული Eko დააბრუნა

გუშინ, 5 სექტემბერს, თბილისში კომპანია ეკოს პირველი ავტოგასამართ სადგური გაიხსნა. ცნობილი კომპანიის საქართველოში დაბრუნდება Wissol Group-ის მუშაობის შედეგია, რომელმაც საბერძნეთის პეტროლიუმთან ფრანჩაიზინგის ხელშეკრულება გააფორმა და ეკოს ავტოგასამართი სადგურების ქსელის განვითარების ექსკლუზიური უფლება მიიღო.

ეკოს პირველი პილოტური ავტოგასამართი სადგური თბილისში, ვაჟა-ფშაველას გამზირ #27-ში გაიხსნა. ამ ხელშეკრულების საფუძველზე ვისოლმა საქართველოს ნავთობპროდუქტების ბაზარზე ეკოს ბრენდი დააბრუნა, რომელიც წლების განმავლობაში ქვეყანაში საწვავის ხარისხის ეტალონად იყო მიჩნეული. ახლად გახსნილ ავტოგასამართ სადგურზე ეკოს უმაღლესი ხარისხის საწვავის სრული სპექტრი იქნება წარმოდგენილი.

ფოტო: ვისოლი

ეკოს ავტოგასამართი სადგურის ოფიციალური გახსნის ცერემონიას ვისოლ ჯგუფის პრეზიდენტი, საბერძნეთის ელჩი საქართველოში დიმიტრიოს კარაბალისი და საბერძნეთის პეტროლიუმის წარმომადგენელი, რობერტო კარაჰანასი დაესწრნენ.

მათ ეკოს ავტოგასამართ სადგური საზეიმოდ, წითელი ლენტის გაჭრით გახსნეს. ამის შემდეგ, თითოეულმა მათგანმა მედიის წარმომადგენლებთან კომენტარი გააკეთა და ეკოს დაბრუნების მნიშვნელობაზე ისაუბრა.

ფოტო: ვისოლი

საბერძნეთის პეტროლიუმის წარმომადგენელმა, რობერტო კარაჰანასმა განაცხადა, რომ ეკოს დაბრუნებით ძალიან მოხარულია და ის ამაყობს ვისოლთან პარტნიორობით.

„ჩვენთვის დიდი პატივია ვისოლთან პარტნიორობა. ვისოლი ერთ-ერთი გამორჩეული კომპანიაა თავისი მაღალი ხარისხითა და სტანდარტებით. საქართველოში დაბრუნება ჩვენთვის წინ გადადგმული ნაბიჯია, რადგან ვხედავთ როგორ ვითარდება ქვეყანა, იზრდება მისი ტურისტული პოტენციალი და ეკონომიკა. ჩვენ მხოლოდ მოხარულები ვართ ამ შეთანხმებით“, – თქვა რობერტო კარაჰანასმა.

ფოტო: ვისოლი

კომენტარი გააკეთა ვისოლ ჯგუფის პრეზიდენტმაც. სოსო ფხაკაძემ აღნიშნა, რომ ეკოს პროდუქტზე მოთხოვნა საკმაოდ მაღალია და მისი დაბრუნებისთვის დიდი ძალისხმევა იყო საჭირო.

„ეკო იყო კომპანია, რომელმაც შექმნა საწვავის ხარისხის სტანდარტი საქართველოში. ეკო იყო ორგანიზაცია, რომელიც ითვლებოდა ხარისხის ეტალონად ჩვენს ქვეყანაში. ყოველწლიურმა სამომხმარებლო კვლევებმა გვიჩვენა, რომ მომხმარებლების დიდი ნაწილი ეკოს დღემდე მოიაზრებს ყველაზე მაღალი ხარისხის საწვავის მქონე კომპანიად. ჩვენ გავიარეთ საკმაოდ რთული გზა, რადგან არ იყო მარტივი ამ კომპანიის უკან დაბრუნება, მაგრამ დღეს ეკო სრულფასოვნად დაბრუნდა საქართველოში და ამის გამო ძალიან მოხარულები ვართ“, – თქვა სოსო ფხაკაძემ.

რით გამოირჩევა Eko-ს საწვავი?

Hellenic Petroleum Group საბერძნეთში ერთ-ერთი ყველაზე დიდი ბიზნესჯგუფია, რომლის სუბსიდირების ქვეშ რამდენიმე კომპანია იმყოფება. ერთ-ერთი მათგანია Eko, რომელიც ხარისხიანი საწვავის წარმოებითაა მსოფლიო ბაზარზე ცნობილი.

პირველ რიგში, Eko გამოირჩევა მაღალტექნოლოგიური ავტოგასამართ სადგურებით, რომელიც აღჭურვილია გამართული უსაფრთხოების სისტემით, რაც ყოველგვარ რისკს მინიმუმამდე ამცირებს. ამასთან, ყველა ავტოგასამართ სადგური, ხარისხის უზრუნველყოფის მიზნით, პერიოდულად მოწმდება. საწვავის ხარისხის გასაუმჯობესებლად და შესანარჩუნებლად კომპანია თანამშრომლობს საწვავის ხარისხის შემსწავლელ მსოფლიოში ცნობილ ლაბორატორიასთან, რომელიც NTUA-ს ტექნოლოგიას იყენებს.

Eko დიდ ყურადღებას უთმობს ბუნებრივი რესურსების მოფრთხილებასა და მასზე ზრუნვას. ამასთან ერთად, Eko-ს საწვავი ცნობილია, როგორც პროდუქტი, რომელიც არ იკარგება. ეს ნიშნავს, რომ ყოველი წვეთი საწვავი, რომელიც თქვენი მანქანის ავზში მოხვდება, სრულად იქნება ათვისებული.

როდის გაიხსნება Eko-ს სხვა სადგურები?

ამ კითხვაზე პასუხი ჯერჯერობით უცნობია. პილოტური ავტოგასამართ სადგურის გაყიდვების ანალიზის საფუძველზე საბერძნეთის პეტროლიუმი და ვისოლ ჯგუფი ერთობლივად მიიღებენ გადაწყვეტილებას სხვა ლოკაციებზეც ეკოს სადგურების განვითარებასთან დაკავშირებით.

შეგახსენებთ, რომ Eko Georgia-მ საქართველოს ბაზარი 2011 წელს დატოვა. Eko საქართველოში ვისოლ ჯგუფთან ფრანჩაიზინგის ხელშეკრულების გაფორმების შემდეგ ოფიციალურად დაბრუნდა და მისი პირველი სადგური ვაჟა-ფშაველას #27 ნომერში გაიხსნა.

კატეგორიები: ეკონომიკა

კომენტარები

მსგავსი სიახლეები