წყალტუბოში სასოფლო-სამეურნეო კოოპერატივების ხელშეწყობის პროგრამები წარადგინეს

წყალტუბოში სასოფლო-სამეურნეო კოოპერატივების ხელშეწყობის პროგრამები წარადგინეს

სასოფლო-სამეურნეო კოოპერატივების განვითარების სააგენტოს თავმჯდომარე გიორგი მიშელაძე, წყალტუბოს მაჟორიტარ დეპუტატ ცოტნე ზურაბიანთან და დევნილთა საარსებო წყაროებით უზრუნველყოფის  სააგენტოს დირექტორ ირაკლი უჯმეჯურიძესთან ერთად წყალტუბოში  ადგილობრივ და დევნილ ფერმერებს  შეხვდა,  რომელთაც  მიმდინარე პროგრამები გააცნო.

გიორგი მიშელაძემ მეფუტკრეობის სასოფლო-სამეურნეო კოოპერატივების ერთიანი საწარმოო უზრუნველყოფის სახელმწიფო პროგრამისა და რძის მწარმოებელი სასოფლო-სამეურნეო კოოპერატივების მხარდამჭერი სახელმწიფო პროგრამის შესახებ ისაუბრა.

მეფუტკრეობის სასოფლო-სამეურნეო კოოპერატივების ერთიანი საწარმოო უზრუნველყოფის სახელმწიფო პროგრამის ფარგლებში დაგეგმილია გორის მუნიციპალიტეტში თაფლის გადამამუშავებელი საწარმოს აშენება, რომელიც ბენეფიციარ სასოფლო-სამეურნეო კოოპერატივს საკუთრებაში  30% თანადაფინანსებით გადაეცემა, რომლის გადახდას კოოპერატივი უზრუნველყოფს 8 წლის განმავლობაში.

საწარმო აღიჭურვება თაფლის წარმოების სრული ციკლისათვის საჭირო  თანამედროვე სტანდარტებთან შესაბამისი დანადგარებით, სადაც შესაძლებელი იქნება დღეში არანაკლებ ორი ტონა თაფლის მიღება,  გადამუშავება, დასაწყობება და სხვადასხვა მოცულობით ჩამოსხმა, საწარმოში ასევე მოხდება  ფიჭის დამზადება.

დადგენილი კრიტერიუმებით, პროგრამაში მონაწილე კოოპერატივში  გაერთიანებული კოოპერატივების რაოდენობა უნდა შეადგენდეს არანაკლებ 35 კოოპერატივს,ხოლო მეპაიეთა  არანაკლებ 15%-ს უნდა შეადგენენ ქალები ან/და დევნილები, ასევე კოოპერატივებს  საკუთრებაში უნდა გააჩნდეთ სასოფლო-სამეურნეო კოოპერატივების განვითარების სააგენტოს მიერ აღრიცხული არანაკლებ  7000 სკა.

შეხვედრაზე საუბარი შეეხო რძის მწარმოებელი სასოფლო-სამეურნეო კოოპერატივების მხარდამჭერ სახელმწიფო პროგრამას, რომელიც   მსხვილფეხა და   წვრილფეხა რქოსანი პირუტყვის (თხა, ცხვარი)  დარგის კოოპერატივების ხელშეწყობას გულისხმობს.

პროგრამაში  რეგისტრაცია სასოფლო-სამეურნეო კოოპერატივების განვითარების სააგენტოს  ვებ-გვერდზე  www.acda.gov.ge   1 მარტამდე გაგრძელდება.

სასოფლო-სამეურნეო კოოპერატივების განვითარების სააგენტოს თავმჯდომარის  გიორგი მიშელაძის განცხადებით,  პროგრამაში ჩართულობით კოოპერატივის წევრებს მიეცემათ შესაძლებლობა,  საკუთარ საწარმოში  გადამუშავებული პროდუქციის რეალიზაციის შედეგად მიიღონ დამატებითი შემოსავალი.

კატეგორიები: საზოგადოება

კომენტარები

მსგავსი სიახლეები