სურსათის უვნებლობის კუთხით, საქართველო გერმანიასთან თანამშრომლობას აღრმავებს

სურსათის უვნებლობის კუთხით, საქართველო გერმანიასთან თანამშრომლობას აღრმავებს

გარემოს დაცვისა და სოფლის მეურნეობის სამინისტროს სოფლის მეურნეობის სამეცნიერო-კვლევითი ცენტრი გერმანიის რისკის შეფასების ფედერალურ ინსტიტუტთან (BfR) თანამშრომლობას აღრმავებს. მხარეებმა გერმანიაში ურთიერთანამშრომლობის მემორანდუმს მოაწერეს ხელი, რომელიც სურსათის უვნებლობის კუთხით რისკის შეფასების ძლიერი ქსელის ჩამოყალიბებას გულისხმობს. სოფლის მეურნეობის სამეცნიერო-კვლევითი ცენტრის ინფორმაციით, ორი ინსტიტუტის თანამშრომლობა ხელს შეუწყობს სურსათის უვნებლობის სისტემის სამეცნიერო პოტენციალის გაძლიერებასა და, შესაბამისად, ორივე ქვეყანაში მომხმარებელთა ჯანმრთელობის დაცვას.
მემორანდუმის ფარგლებში ჩამოყალიბდება ინფორმაციის გაცვლისა და კომუნიკაციის მექანიზმი, შემუშავდება ახალი პროგრამები და მოხდება თანამშრომლების კვალიფიკაციის ამაღლება. ასევე, დაგეგმილია ერთობლივი სემინარებისა და ტრენინგების გამართვა.
„მნიშვნელოვანია საქართველოში ქიმიური, მიკრობიოლოგიური და მოლეკულურ-გენეტიკური კვლევების განვითარება როგორც სურსათის უვნებლობის, ისე – ვეტერინარიისა და ფიტოსანიტარიის რისკის შეფასების მიმართულებით. გერმანელი კოლეგების გამოცდილება დაგვეხმარება საქართველოში აღნიშნული სფეროების გაძლიერებაში“, – განაცხადა სოფლის მეურნეობის სამეცნიერო-კვლევითი ცენტრის დირექტორმა, ლევან უჯმაჯურიძემ.
გერმანიის რისკის შეფასების ფედერალურ ინსტიტუტში ლევან უჯმაჯურიძე შეხვდა BfR-ის პრეზიდენტს – ანდრეას ჰენზელს, აღამსრულებელ დირექტორს – მაგნუს იეგერსა და გერმანიის სურსათისა და სოფლის მეურნეობის ფედერალური სამინისტროს რეგიონალურ დირექტორს – შტეფან ჰუბნერს. მხარეებმა ისაუბრეს სურსათის უვნებლობის სფეროში რისკის შეფასების მნიშვნელობასა და ამ მიმართულებით კვლევების გაფართოების აუცილებლობაზე. როგორც შტეფან ჰუბნერმა აღნიშნა, საქართველოსთვის სურსათის უვნებლობის გაძლიერება მნიშვნელოვანია როგორც ტურიზმის განვითარების ხელშეწყობისთვის, ასევე – ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმებით (DCFTA) ნაკისრი ვალდებულებების შესრულებისთვის.

კატეგორიები: საზოგადოება

კომენტარები

მსგავსი სიახლეები