სალომე ზურაბიშვილი: აქციის ღამეს პოლიციელები იყვნენ არნახული ძალადობის ქვეშ და ძალიან დიდხანს გაუძლეს ამ ძალადობას

სალომე ზურაბიშვილი: აქციის ღამეს პოლიციელები იყვნენ არნახული ძალადობის ქვეშ და ძალიან დიდხანს გაუძლეს ამ ძალადობას

„არ შემიძლია, არ ვახსენო ჟურნალისტები და პოლიციელები, რომლებიც თავიანთ პროფესიულ მოვალეობას ასრულებდნენ იმ ღამეს“, – განაცხადა საქართველოს პრეზიდენტმა, სალომე ზურაბიშვილმა პრეზიდენტის ათონელის სასახლეში, სადაც აქციის ღამეს გამოვლენილი მაღალი პროფესიონალიზმისთვის მედიკოსები ღირსების მედლებით დააჯილდოვა.
პრეზიდენტმა მედიის წარმომადგენლებს, პოლიციის თანამშრომლებსა და მედიკოსებს პროფესიული მოვალეობის შესრულებისთვის მადლობა გადაუხადა.
ამასთან, სალომე ზურაბიშვილმა სიტყვით გამოსვლისას ხაზი გაუსვა პოლიციელების მიმართ განხორციელებულ ძალადობას.
მისივე განმარტებით, აქციის ღამეს პოლიციელები იყვნენ არნახული ძალადობის ქვეშ და ძალიან დიდხანს გაუძლეს ამ ძალადობას.
„ეს დღეს არის განსაკუთრებული. მინდა, რომ ეს იყოს მადლობის თქმის დღე. 20-21 ივნისის ღამეს რუსთაველის გამზირზე ჯანდაცვის სფეროს წარმომადგენლებმა მთელი ღამის განმავლობაში თავდაუზოგავად იშრომეს. ჩვენს მოქალაქეებს სამედიცინო დახმარება დროულად აღმოუჩინეს და შეძლეს მათი გადაყვანა სამედიცინო დაწესებულებებში. მინდა, მათ დიდი მადლობა გადავუხადო მთელი საზოგადოების სახელით. ოპერაციებმა წარმატებით ჩაიარა ექვსი პაციენტის შემთხვევაში – შეუნარჩუნდათ მხედველობა და ეს არის ძალიან მნიშვნელოვანი, რადგან ამ ახალგაზრდების თვალები არის ჩვენი მომავლის თვალები. სამწუხაროდ, რამდენიმე პაციენტის მდგომარეობა დღემდე რჩება მძიმე და ექიმები მათი გამოჯანმრთელებისთვის ყველაფერს აკეთებენ.
მინდა, ყველას მადლობა ვუთხრა. არ შემიძლია, არ ვახსენო ის ადამიანები, ჟურნალისტები, მაგალითად, რომლებიც თავის პროფესიულ მოვალეობას ასრულებდნენ იმ ღამეს. მათ შორისაც არიან დაზარალებულები და მათ მიმართ მინდა, თანადგომა გამოვხატო; ასევე, პოლიციელების მიმართ, რომლებიც იმ ღამეს იყვნენ ასევე არნახული ძალადობის ქვეშ და ძალიან დიდხანს გაუძლეს ამ ძალადობას. აქ არ შევეხები იმ საკითხს, ძალის გადამეტება თუ მოხდა. ამის შესახებ მიმდინარეობს გამოძიება და გამოძიებისა და სასამართლოს საკითხია ეს და ვინც დასასჯელია, უნდა დაისაჯოს. მაგრამ ეს არ უნდა გავრცელდეს ყველა პოლიციელზე, რადგან ამ ქვეყანაში დემოკრატია არ იქნება, თუ არა ჟურნალისტები; სახელმწიფო არ იქნება, თუ არა სამართალდამცველები და საზოგადოება არ იქნება, თუ არა თქვენ, ყველა“, – განაცხადა სალომე ზურაბიშვილმა.

კატეგორიები: პოლიტიკა

კომენტარები

მსგავსი სიახლეები