„მჯერა, რომ ქვეყნები ერთმანეთს უნდა ეჯიბრებოდნენ არა ძალით, აგრესიითა თუ ზეწოლით, არამედ, უკეთესი საგანმანათლებლო სისტემით და კულტურით”-ირაკლი კობახიძე

„მჯერა, რომ ქვეყნები ერთმანეთს უნდა ეჯიბრებოდნენ არა ძალით, აგრესიითა თუ ზეწოლით, არამედ, უკეთესი საგანმანათლებლო სისტემით და კულტურით”-ირაკლი კობახიძე

„მჯერა, რომ ქვეყნები ერთმანეთს უნდა ეჯიბრებოდნენ არა ძალით, აგრესიითა თუ ზეწოლით, არამედ, უკეთესი საგანმანათლებლო სისტემით და კულტურით”,- ამის შესახებ საქართველოს პარლამენტის თავმჯდომარემ ევროპის საბჭოს საპარლამენტო ასამბლეის კულტურის, მეცნიერების, განათლებისა და მედიის კომიტეტის სხდომაზე განაცხადა.
საქართველოს პარლამენტი ევროპის საბჭოს საპარლამენტო ასამბლეის კულტურის, მეცნიერების, განათლებისა და მედიის კომიტეტის სხდომას მასპინძლობს. ირაკლი კობახიძემ დამსწრეებს მისასალმებელი სიტყვით მიმართა.
„ჩვენთვის დიდი პატივია ვუმასპინძლოთ ევროპის საბჭოს საპარლამენტო ასამბლეის კულტურის, მეცნიერების კომიტეტის სხდომას საქართველოში. ჩვენ დიდ პატივს ვცემთ ყველა იმ ღირებულებას, რომელსაც ევროპის საბჭო და ევროპის საბჭოს საპარლამენტო ასამბლეა ეფუძნება. ჩვენთვის ერთ-ერთი უმთავრესი პრიორიტეტია განათლების, კულტურის, მედიის და მეცნიერების პოპულარიზაცია.
ვამაყობთ ჩვენი კულტურით, ვამაყობთ კულტურის ისტორიით და ჩვენი მიზანია, მეგობრებს ჩვენი კულტურა გავაცნოთ. გვაქვს საკმაოდ ამბიციური გეგმა, რომ განვავითაროთ განათლების სისტემა. გვჯერა, რომ კარგად განათლებულ საზოგადოებას დიდი წვლილის შეტანა შეუძლია მსოფლიოს გაუმჯობესებაში. გვჯერა, რომ ქვეყნები ერთმანეთს უნდა ეჯიბრებოდნენ არა ძალით, აგრესიითა თუ ზეწოლით, არამედ, უკეთესი საგანმანათლებლო სისტემით და კულტურით. ამ შემთხვევაში, მსოფლიო იქნება ბევრად უკეთესი”,- აღნიშნა ირაკლი კობახიძემ.
მისი თქმით, მიუხედავად გამოწვევებისა და რუსეთის ფედერაციის მიერ საქართველოს ორი ისტორიული რეგიონის ოკუპაციისა, ქვეყანამ მნიშვნელოვან პროგრესს მიაღწია.
„მიუხედავად იმისა, რომ ჩვენი ორი ისტორიული რეგიონი არის ოკუპირებული რუსეთის მიერ, ჩვენი ქვეყანა პროგრესირებს, ვითარდება და ჩვენ წინა რიგებში ვდგავართ არა მხოლოდ დემოკრატიული ღირებულებების განვითარების, არამედ ეკონომიკური სისტემის გაძლიერების კუთხით. ძალიან ვამაყობთ ამ მიღწევებით”,- განაცხადა პარლამენტის თავმჯდომარემ.
ირაკლი კობახიძემ ხაზგასმით აღნიშნა, რომ საქართველო იმავე ღირებულებებს იზიარებს, რაზეც ევროპის საბჭოა დაფუძნებული. პარლამენტის თავმჯდომარის თქმით, დემოკრატია, თავისუფლება და ტოლერანტობა ქართული კულტურის ნაწილია.
„ჩვენ ვეთანხმებით და ვეფუძნებით ყველა იმ ღირებულებას, რომელზეც არის დაფუძნებული ევროპის საბჭო. ჩვენ გვჯერა, რომ დემოკრატია, თავისუფლება და ტოლერანტობა ასევე არის ჩვენი კულტურის ნაწილი და რა თქმა უნდა, ძალისხმევას არ დავიშურებთ იმისთვის, არა მარტო საქართველოში, არამედ ჩვენს რეგიონში ეს ღირებულებები იყოს პატივცემული”,- განაცხადა სიტყვით გამოსვლისას საქართველოს პარლამენტის თავმჯდომარემ.

კატეგორიები: პოლიტიკა

კომენტარები

მსგავსი სიახლეები