მამუკა ბახტაძე დრეზდენში საქსონიის მიწის პრემიერ-მინისტრს შეხვდა

მამუკა ბახტაძე დრეზდენში საქსონიის მიწის პრემიერ-მინისტრს შეხვდა

საქართველოს პრემიერ-მინისტრი მამუკა ბახტაძე დრეზდენში საქსონიის მიწის პრემიერ-მინისტრ მიხაელ კრეჩმერს შეხვდა.
როგორც “კვირას” პრემიერ-მინისტრის პრესსამსახურიდან აცნობეს, საქართველოს მთავრობის მეთაურის პატივსაცემად გამართულ ოფიციალურ ვახშამზე, მიხაელ კრეჩმერმა მამუკა ბახტაძეს მადლობა გადაუხადა დრეზდენის გალერეის დაკარგული ექსპონატის, პიეტრო ფრანჩესკო ჩიტადინის მე-17 საუკუნის ფერწერული ტილოს დაბრუნებისთვის, რომელიც საქართველოს პრემიერ-მინისტრმა გერმანიის ფედერაციული რესპუბლიკის კანცლერ ანგელა მერკელს რამდენიმე თვის წინ, თბილისში ვიზიტისას გადასცა.
საუბარი შეეხო საქართველო-გერმანიის ურთიერთობების განვითარების პოზიტიურ დინამიკას, განსაკუთრებით ბოლო პერიოდში და სხვადასხვა სფეროში წარმატებულ თანამშრომლობას.
მხარეებმა ასევე განიხილეს ეკონომიკური კავშირების გაღრმავების მიმართულებით არსებული პოტენციალი, პროფესიული განათლების სფეროში თანამშრომლობის პერსპექტივა და ისაუბრეს ახალი ტექნოლოგიების დანერგვის მიმართულებით გამოცდილების გაზიარებაზე.
მამუკა ბახტაძემ საქსონიის მიწის პრემიერ-მინისტრს, ასევე ინფორმაცია საქართველოში განხორციელებული და დაგეგმილი რეფორმების შესახებ მიაწოდა, მათ შორის განათლების სფეროში, რაც ადამიანური კაპიტალის განვითარებასა და ქვეყნის ეკონომიკურ აღმავლობას ისახავს მიზნად.

კატეგორიები: პოლიტიკა

კომენტარები

მსგავსი სიახლეები