ირაკლი სესიაშვილი: კანადის პარლამენტის თავდაცვის კომიტეტის რეზოლუცია თანამშრომლობის ფართო არეალს და შესაძლებლობებს ქმნის

ირაკლი სესიაშვილი: კანადის პარლამენტის თავდაცვის კომიტეტის რეზოლუცია თანამშრომლობის ფართო არეალს და შესაძლებლობებს ქმნის

საპარლამენტო უმრავლესობის წევრი ირაკლი სესიაშვილი თავდაცვის კომიტეტის მიერ მიღებულ რეზოლუციას ეხმაურება, რომელიც საქართველოს, უკრაინის და მოლდოვას წინაშე არსებულ უსაფრთხოების გამოწვევებს მიეძღვნა. მისი თქმით, რეზოლუცია, არაღიარების პოლიტიკის კონტექსტში მნიშვნელოვანია და ამ კუთხით კანადის მნიშვნელოვან პოლიტიკურ მხარდაჭერას წარმოადგენს.
“მინდა გამოვეხმაურო, კანადის პარლამენტის თავდაცვის კომიტეტის მიერ 2018 წლის 4 დეკემბერს მიღებულ რეზოლუციას, რომელიც საქართველოს, უკრაინისა და მოლდოვას წინაშე არსებულ უსაფრთხოების გამოწვევებს მიეძღვნა.
პირველ რიგში აღვნიშნავ, რომ საერთაშორისო არენაზე, კანადა ჩვენი ქვეყნის მნიშვნელოვანი მოკავშირე და მხარდამჭერია, როგორც საქართველოს სუვერენიტეტისა და ტერიტორიული მთლიანობის, ასევე, ევროატლანტიკური ინტეგრაციის საკითხებში. შესაბამისად, მადლობა მინდა გადავუხადო კანადის პარლამენტის თავდაცვის კომიტეტს, საქართველოს, უკრაინის და მოლდოვას სუვერენიტეტის, ტერიტორიული მთლიანობისა და უსაფრთხოების მხარდამჭერი რეზოლუციისათვის.
რეზოლუციაში ხაზგასმულია, 2008 წელს რუსეთის მიერ საქართველოს წინააღმდეგ წარმოებული ომის შედეგად, აფხაზეთისა და სამაჩაბლოს უკანონო ოკუპაცია, რაც, მორიგი საერთაშორისო დოკუმენტია, სადაც აღნიშნულია რუსეთის, როგორც ოკუპირებულ ტერიტორიებზე კონტროლის განმახორციელებელი ძალის პასუხისმგებლობა, მოსახლეობის უფლებების დარღვევისა და მათი სიცოცხლის ხელყოფის ფაქტებზე. რეზოლუცია, ასევე, მნიშვნელოვანია არაღიარების პოლიტიკის კონტექსტში და ამ კუთხით, კანადის მნიშვნელოვან პოლიტიკურ მხარდაჭერას წარმოადგენს. ამასთანავე, მოუწოდებს კანადის მთავრობას, გაავრცელოს კანადის პარლამენტის მიერ მიღებული „უცხოეთის კორუმპირებული მთავრობების მსხვერპლთა მიმართ სამართლიანობის აღდგენის“ კანონით დაწესებული სანქციები საქართველოს წინააღმდეგ აგრესიაში ბრალდებულ პირთა მიმართ, რაც პირდაპირ ეხმიანება ტატუნაშვილი-ოთხოზორიას სიას”, – განაცხადა ირაკლი სესიაშვილმა.
მისივე თქმით, კანადის პარლამენტის თავდაცვის კომიტეტის რეზოლუცია თანამშრომლობის ფართო არეალს და შესაძლებლობებს ქმნის. ამიტომ დეპუტატის განცხადებით, საქართველოს პარლამენტი კანადის მთავრობასთან და პარლამენტთან რეზოლუციაში ასახული საკითხების პრაქტიკული რეალიზებისათვის თანამშრომლობის კონკრეტულ მექანიზმებზე მუშაობას გააგრძელებს.
“საქართველოს ევრო-ატლანტიკურ ინტეგრაციასთან დაკავშირებით, რეზოლუცია მოუწოდებს კანადის მთავრობას, ლობირება გაუწიოს შავი ზღვის რეგიონში ნატო-ს ჩართულობას და საქართველოს, უკრაინის და მოლდოვას ნატო-ში ინტეგრაციას. ასევე, მოუწოდებს, თავდაცვის სფეროში შეთანხმების გაფორმებისაკენ, რაც მნიშვნელოვან საფუძველს შეუქმნის თავდაცვის სფეროში ურთიერთანამშრომლობის ახალ ეტაპზე გადასვლას და ჩვენი ქვეყნის თავდაცვის შესაძლებლობების განვითარებას. ამასთანავე, რეზოლუცია მოუწოდებს კანადის მთავრობას, მხარი დაუჭიროს საქართველოს, უკრაინასა და მოლდოვას ჰიბრიდულ თავდასხმებთან გამკლავებაში, განსაკუთრებით, სამთავრობო სტრუქტურებსა და კრიტიკულ ინფრასტრუქტურაზე კიბერთავდასხმებთან და მედიის მეშვეობით უცხოური პროპაგანდისა და დეზინფორმაციის გავრცელებასთან ბრძოლაში.
დასასრულს, მინდა აღვნიშნო, რომ კანადის პარლამენტის თავდაცვის კომიტეტის ზემოაღნიშნული რეზოლუცია თანამშრომლობის ფართო არეალს და შესაძლებლობებს ქმნის. უახლოეს მომავალში, კანადასთან თავდაცვისა და უსაფრთხოების სფეროში თანამშრომლობა ახალ საფეხურზე შეიძლება ავიდეს, განსაკუთრებით ჰიბრიდული გამოწვევების, დეზინფორმაციასთან და პროპაგანდასთან ბრძოლის სფეროში. ასევე, კიბერუსაფრთხოების მიმართულებით. მნიშვნელოვანია ამ განწყობების კონკრეტულ თანამშრომლობის მექანიზმებად გარდაქმნა. შესაბამისად, საქართველოს მთავრობა, დიპლომატიური კორპუსი და საქართველოს პარლამენტი გააგრძელებს კანადის მთავრობასთან და პარლამენტთან რეზოლუციაში ასახული საკითხების პრაქტიკული რეალიზებისათვის თანამშრომლობის კონკრეტულ მექანიზმებზე მუშაობას”,-აღნიშნა ირაკლი სესიაშვილმა.

კატეგორიები: პოლიტიკა

კომენტარები

მსგავსი სიახლეები