გიორგი გახარია: ჩვენი ძირითადი მიზანი უნდა იყოს სამუშაო ადგილების მაქსიმალური რაოდენობა, რომ ლარის მერყეობას არ ჰქონდეს ისეთი სერიოზული სოციალური ზეგავლენა, როგორიც აქვს დღეს

გიორგი გახარია: ჩვენი ძირითადი მიზანი უნდა იყოს სამუშაო ადგილების მაქსიმალური რაოდენობა, რომ ლარის მერყეობას არ ჰქონდეს ისეთი სერიოზული სოციალური ზეგავლენა, როგორიც აქვს დღეს

პრემიერ-მინისტრობის კანდიდატმა, გიორგი გახარიამ ლარის კურსთან დაკავშირებით, დეპუტატის მიერ დასმულ შეკითხვაზე, უპასუხა, რომ ლარიზაცია უნდა გაგრძელდეს. მისი განცხადებით, მიზანი არის, რომ ეროვნულ ბანკთან კოორდინირებული მუშაობის შედეგად, კურსის მერყეობა არ იყოს შოკური და მოულოდნელი.

„ლარის კურსთან დაკავშირებით, ორი ყველაზე მნიშვნელოვანი ნეგატიური ფაქტორია, ეს გახლავთ: ჩვენი მოქალაქეები და იურიდიული კომპანიები, რომელთაც ვალი აქვთ, სესხები აქვთ დოლარში და გაცვლითი კურსი პირდაპირი დარტყმაა მათთვის. ეს უკვე ხდება არა მხოლოდ ეკონომიკური ან კომერციული – სოციალურ პრობლემებში გადადის, ამიტომ უნდა გავაგრძელოთ ლარიზაცია. ერთმნიშვნელოვნად, ლარიზაცია იყო სწორი გადაწყვეტილება და ეს მიმართულება უნდა გავაგრძელოთ.

რა თქმა უნდა, ფასების ზრდა – აქ ჩვენ ფინანსური სტაბილურობისა და მაკროეკონომიკური სტაბილურობის ნაწილში, ძალიან მჭიდროდ უნდა ვიმუშაოთ ეროვნულ ბანკთან, ჩვენ-ჩვენი კომპეტენციის ფარგლებში, თუმცა, კოორდინირების ხარისხი უნდა იყოს ძალიან მაღალი. ჩვენი ძირითადი მიზანი უნდა გახლდეთ შემდეგი, რომ ლარის კურსის მერყეობა არ უნდა იყოს შოკური და მოულოდნელი. ის უნდა იყოს ძალიან დაბალანსებული. არ შეიძლება, რომ ასეთი მერყეობისთვის ჩვენ მზად არ ვიყოთ.

ჩვენ ვართ აბსოლუტურად ღია ეკონომიკა, ჩვენი ეკონომიკის და მაკროეკონომიკური სტაბილურობის დიდი ნაწილი დამოკიდებულია ჩვენს ძირითად სავაჭრო პარტნიორებზე, თუმცა, ჩვენ შიდა მდგრადობის ბევრი, კარგი კომპონენტი გაგვაჩნია. მარტივი გადაწყვეტილებები არსებობს, როგორც ადრე წყვეტდნენ. საგარეო ვალის ხარჯზე, ლარის კურსის დაჭერა, მარტივია. საგარეო ვალი, რეზერვები, დოლარის მიწოდება ბაზრისთვის. დოლარი შეიძლება გავაიაფოთ ძალიან სწრაფად და შოკურად, მაგრამ ეს არის ეკონომიკისთვის გრძელვადიანად დამანგრეველი, ამიტომ ჩვენი ძირითადი მიზანი უნდა იყოს სამუშაო ადგილები, დივერსიფიცირებული ეკონომიკა, მაკროეკონომიკური სტაბილურობა, ფინანსური სტაბილურობა და მაქსიმალური რაოდენობა სამუშაო ადგილების, რამეთუ ლარის მერყეობას არ ჰქონდეს ისეთი სერიოზული სოციალური ზეგავლენა, როგორიც აქვს დღეს“, – განაცხადა გიორგი გახარიამ.

კატეგორიები: პოლიტიკა

კომენტარები

მსგავსი სიახლეები