დიმიტრი ქუმსიშვილი-„ძალიან მნიშვნელოვანია, არჩილ ტატუნაშვილის ცხედარი უმოკლეს პერიოდში დაუბრუნდეს თავის ოჯახს“

დიმიტრი ქუმსიშვილი-„ძალიან მნიშვნელოვანია, არჩილ ტატუნაშვილის ცხედარი უმოკლეს პერიოდში დაუბრუნდეს თავის ოჯახს“

 

ჩემთვის ცოტა ძნელია დღეს დილით შეფასების გაკეთება რუსეთის საგარეო საქმეთა სამინისტროს განცხადებასთან დაკავშირებით, – ამის შესახებ პირველმა ვიცე პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა რუსეთის საგარეო საქმეთა სამინისტროს მიერ გავრცელებული განცხადების თაობაზე აღნიშნა.
ქუმსიშვილის თქმით, ამ ეტაპზე უმნიშვნელოვანესია, რომ არჩილ ტატუნაშვილის ცხედრის გადმოსვენება უმოკლეს დროში მოხდეს.
“ჩემთვის ცოტა ძნელია დღეს დილით შეფასების გაკეთება, რუსეთის საგარეო საქმეთა სამინისტროს განცხადებასთან დაკავშირებით. პირადად ჩემთვის, როგორც მოქალაქისთვის, ორი რამაა მნიშვნელოვანი. ერთი მხრივ, პლატფორმა, რომელიც ჩვენ გვაქვს, ანუ ჟენევის პლატფორმა იყო მაქსიმალურად სასარგებლო ჩვენი ქვეყნისთვის იმისთვის, რომ მოხდეს იმ პრობლემების გადაჭრა, რომელიც ჩვენ გვაქვს და მეორე მხრივ, ძალიან მნიშვნელოვანია, რომ ცხედარი უმოკლეს პერიოდში დაუბრუნდეს თავის ოჯახს. ჩემთვის ეს არის მნიშვნელოვანი. შედეგებზე ცოტა მოგვიანებით ვიმსჯელოთ”, – განაცხადა დიმიტრი ქუმსიშვილმა.
ცნობისათვის, რუსეთის საგარეო პოლიტიკურ უწყებაში საქართველოს პრემიერ-მინისტრის, გიორგი კვირიკაშვილის 9 მარტის განცხადებას გამოეხმაურნენ, რომელიც უწყების ვებგვერდზეა განთავსებული.
როგორც განცხადებაშია აღნიშნული, მოსკოვში ყურადღებით გაეცნენ საქართველოს პრემიერ-მინისტრ გიორგი კვირიკაშვილის 9 მარტის განცხადებას. „კმაყოფილებით აღვნიშნავთ მასში გადმოცემულ განწყობას ორმხრივი ურთიერთობის ნორმალიზების პროცესის გაღრმავების შესახებ. არავის უნდა ჰქონდეს ეჭვი, რომ რუსეთი, როგორც მანამდე, დაინტერესებულია მეზობელ საქართველოსთან ურთიერთობის გაჯანსაღებით და მზადაა, იმდენად შორს წავიდეს, რამდენადაც ამისთვის მზად იქნება თბილისი.
გიორგი კვირიკაშვილის მიერ ხსენებული სწრაფვა პროგრესისკენ ჟენევის დისკუსიებში, იმედს გვაძლევს საქართველოს მხარის კონსტრუქციულობასთან დაკავშირებით, რაც მარტის ბოლოსთვის დაგეგმილ მორიგ რაუნდს უკავშირდება.
დარწმუნებულები ვართ, რომ ასეთი მიდგომა მხარდაჭერილი იქნებოდა მოლაპარაკებების დანარჩენი მონაწილეების მიერაც, იმისგან დამოუკიდებლად, თუ ვინ უხელმძღვანელებს საქართველოს დელეგაციას.
შეუძლებელია არ მივესალმოთ, ასევე, დეკლარირებულ მისწრაფებას აფხაზეთთან და სამხრეთ ოსეთთან პირდაპირ დიალოგის შესახებ. სწორედ ასეთია ერთადერთი რეალური გზა იმ საკითხების დასარეგულირებლად, რომლებიც საქართველოს აწუხებს, რომელიც რუსეთ-საქართველოს ორმხრივი დღის წესრიგის ფარგლებს გარეთ არსებობს. კერძოდ, ეს ეხება ცოტა ხნის წინანდელ ინციდენტს საქართველოს მოქალაქე არჩილ ტატუნაშვილთან დაკავშირებით, რაც მწუხარებას იწვევს“, – ნათქვამია რუსეთის საგარეო საქმეთა სამინისტროს განცხადებაში.

კატეგორიები: საზოგადოება

კომენტარები

მსგავსი სიახლეები