„ჩვენ ნამდვილად ვაფასებთ ევროკავშირის მხარდაჭერას და პირადად თქვენს წვლილს საქართველის ევროინტეგრაციის პროცესის წინსვლაში, უნდა აღვნიშნო, რომ საქართველო მყარად დგას ამ გზაზე“

„ჩვენ ნამდვილად ვაფასებთ ევროკავშირის მხარდაჭერას და პირადად თქვენს წვლილს საქართველის ევროინტეგრაციის პროცესის წინსვლაში, უნდა აღვნიშნო, რომ საქართველო მყარად დგას ამ გზაზე“

„ჩვენ ნამდვილად ვაფასებთ ევროკავშირის მხარდაჭერას და პირადად თქვენს წვლილს საქართველის ევროინტეგრაციის პროცესის წინსვლაში, უნდა აღვნიშნო, რომ საქართველო მყარად დგას ამ გზაზე“ – ამის შესახებ საქართველოს პრემიერ-მინისტრმა, მამუკა ბახტაძემ, ბრიუსელში ევროპული საბჭოს პრეზიდენტ დონალდ ტუსკთან შეხვედრის შემდეგ, ერთობლივი განცხადებების გაკეთებისას აღნიშნა.
საქართველოს პრემიერ-მინისტრმა დონალდ ტუსკს მადლობა გადაუხადა, თბილი მიღებისთვის.
„დიდი მადლობა, თქვენო აღმატებულებავ! პირველ რიგში, მინდა, მადლობა გადავუხადო პრეზიდენტ ტუსკს ძალიან თბილი მიღებისთვის. ჩვენ ნამდვილად ვაფასებთ ევროკავშირის მხარდაჭერას და პირადად თქვენს წვლილს საქართველის ევროინტეგრაციის პროცესის წინსვლაში, უნდა აღვნიშნო, რომ საქართველო მყარად დგას ამ გზაზე. სწორედ ამ მიზეზის გამო, ლოგიკურია, რომ უცხოეთში ჩემი პირველი სამუშაო ვიზიტის ადგილი ბრიუსელია. შეხვედრის დროს ჩვენ შესაძლებლობა გვქონდა შეგვეფასებინა ჩვენი ერთობლივი დღის წესრიგის თვალსაზრისით არსებული მიღწევები და განგვეხილა ურთიერთობების და თანამშრომლობის გაღრმავების შემდგომი პერსპექტივები. ასოცირების შეთანხმებით, მათ შორის, ღრმა და ყოვლისმომცველი სავაჭრო სივრცის შესახებ შეთანხმებით, ჩვენ განვახორციელეთ ჩვენი საკანონმდებლო და ინსტიტუციური სისტემის რეკონსტრუქცია ევროკავშირის ნორმებთან და სტანდარტებთან შესაბამისობაში მოყვანით. ამან მოახდინა მთავრობის მიერ რეფორმების მცდელობების კონსოლიდირება დემოკრატიის, კარგი მმართველობის, კანონის უზენაესობის და სტაბილურობის განმტკიცების მიმართულებით. ღრმა და ყოვლისმომცველი თავისუფალი სავაჭრო სივრცის შესახებ შეთანხმების მეშვეობით ჩვენ ვახდენდით ჩვენი ეკონომიკის მოდერნიზებას და მის თანდათანობით ინტეგრირებას ევროკავშირის ბაზართან. რეფორმების შედეგად ევროკავშირთან ვაჭრობა არსებითად გაიზარდა, რაც ევროკავშირს ჩვენს უდიდეს სავაჭრო პარტნიორად აქცევს; ჩვენ სწრაფად ვაუმჯობესებთ ჩვენს პოზიციებს საერთაშორისო რეიტინგებში და ვქმნით უკეთეს საინვესტიციო და ბიზნეს-კლიმატს. უვიზო მიმოსვლის რეჟიმმა საქართველოს მოქალაქეებს პირდაპირი ხელშესახები შედეგები მოუტანა. მან ხელი შეუწყო ბიზნესის წარმოებას, კიდევ უფრო გააძლიერა აკადემიური, ტურისტული და კულტურული კავშირები ჩვენს ხალხებს შორის. ეს მიღწევები დაკავშირებულია პასუხისმგებლობებთან, რომლებსაც ჩვენ სრულად ვიზიარებთ. განსაკუთრებით უნდა აღვნიშნო ევროკავშირის განსაკუთრებული როლი საქართველოში მშვიდობისა და სტაბილურობის ხელშეწყობის თვალსაზრისით, მონიტორინგის მისიის მეშვეობით, ევროკავშირის სპეციალური წარმომადგენლის შუამავლობით ჟენევის საერთაშორისო დისკუსიებში, ასევე აქტიური არაღიარების და ჩართულობის პოლიტიკის განხორციელებით. ნება მომეცით, გამოვხატო ჩვენი ღრმა მადლიერება ევროკავშირის მონიტორინგის მისიის მანდატის გახანგრძლივების გამო. სამწუხაროდ, 2008 წლის აგვისტოს ომიდან 10 წლის შემდეგ, რუსეთის მიერ საქართველოს ტერიტორიების ოკუპაცია და ფაქტობრივი ანექსია კვლავ გრძელდება, რაც აუარესებს უსაფრთხოებასა და ადამიანის უფლებების დაცვის მდგომარეობას იმ ადამიანებისთვის, რომლებზეც გავლენა მოხდინა კონფლიქტმა. ამ ვითარებაში, ევროკავშირის და ჩვენი საერთაშორისო პარტნიორების მყარი პოზიცია რუსეთის უკანონო პოლიტიკასთან დაკავშირებით და მათი ეფექტიანი ჩართულობა მნიშვნელოვან გავლენას ახდენს საერთაშორისოდ აღიარებულ საზღვრებში საქართველოს ტერიტორიული მთლიანობის უზრუნველყოფაზე. მაშინ, როდესაც მყარად ერთგულნი ვართ სამშვიდობო პოლიტიკის, საქართველოს მთავრობა ახორციელებს კონკრეტულ მცდელობებს შერიგების და ნდობის აღდგენისთვის, რაც გაწერილია ჩვენს ახალ სამშვიდობო ინიციატივაში „ნაბიჯი უკეთესი მომავლისკენ”. ამავე დროს, საქართველო რჩება ევროკავშირის საიმედო მოკავშირედ – ჩვენ ვამაყობთ, რომ ჩვენს ევროპელ პარტნიორებთან ერთად საკუთარი წვლილი შეგვაქვს ევროკავშირის მიერ განხორციელებულ სამშვიდობო და სტაბილურობის მისიებში მსოფლიოს მასშტაბით. ევროკავშირთან სტრატეგიული უსაფრთხოების დიალოგი კიდევ ერთი დადასტურებაა იმისა, რომ საქართველო და ევროკავშირი იზიარებენ საერთო ინტერესებს საერთო გამოწვევებზე რეაგირებისას. დღეს, როგორც არასდროს, მოტივირებულნი ვართ, რომ გავაკეთოთ უფრო მეტი და წავიდეთ უფრო შორს ევროინტეგრაციის გზაზე. ახალი, მოტივირებული მთავრობის არსებობის პირობებში, ჩვენ ვაპირებთ, რომ უზრუნველვყოთ ახალი დინამიკა, რაც გააუმჯობესებს საქართველოს ეკონომიკურ მოდერნიზაციას და დემოკრატიულ ტრანსფორმაციას. მსურს, მადლობა გადავუხადო პრეზიდენტ ტუსკს იმისთვის, რაც ბრძანა – რომ სრულად უჭერს მხარს ჩვენს ეკონომიკურ პროგრამას, რათა პოლიტიკა უფრო ინკლუზიური ეკონომიკური ზრდისკენ მივმართოთ. სწორედ ამ მიზეზის გამო, ერთობლივი ინიციატივის სახით შევიმუშავებთ საგზაო რუკას, რომლის მიზანია საქართველოს ევროკავშირთან კიდევ უფრო დაახლოება და ახალი შესაძლებლობების შექმნა ევროკავშირთან უფრო მეტად ინტეგრაციისთვის. პრეზიდენტო ტუსკ, ჩვენ ვაფასებთ თქვენს მეგობრობას და რომ განვაზოგადოთ – ევროკავშირის მეგობრობას და საქართველოსთვის მხარდაჭერას. ჩვენი არსებული ურთიერთობების სოლიდური ბაზის პირობებში ჩვენ ვცდილობთ ახალი შესაძლებლობების მოძიებას და მუშაობას, რათა კიდევ უფრო გაძლიერდეს საქართველოსა და ევროკავშირს შორის არსებული კავშირები. დიდი მადლობა!“ – განაცხადა მამუკა ბახტაძემ.

კატეგორიები: პოლიტიკა

კომენტარები

მსგავსი სიახლეები