ჩრდილოეთ ოსეთი როკის გვირაბისთვის სახელის გადარქმევის ინიციატივით გამოდის და გვირაბისთვის ბილარ კაბალოევის სახელის დარქმევას აპირებს, რომელიც ჩრდილოეთ ოსეთის ყოფილი მმართველი და გვირაბის მშენებლობის ინიციატორი იყო.
ამ ინიციატივით კაბალოევის 100 წლის იუბილესთან დაკავშირებით შექმნილი საორგანიზაციო კომიტეტის წევრები გამოვიდნენ და შესაბამისი მიმართვა ფედერალურ სტრუქტურასაც გადაუგზავნეს, რომლის კონტროლქვეშაც არის აღნიშნული გვირაბი.
როკის გვირაბი კავკასიონის მთებშია გაჭრილი და ჩრდილოეთ ოსეთ-ალანიას (რუსეთის ფედერაცია) ცხინვალის რეგიონთან (საქართველო) აკავშირებს.
გვირაბი საბჭოთა ხელისუფლებამ ააგო (მშენებლობა დასრულდა 1984 წელს). მისი სიგრძე 3 730 მეტრია და ზღვის დონიდან დაახ. 2000 მეტრზე მდებარეობს.
2008 წლის რუსეთ-საქართველოს ომის დროს შიდა ქართლის ცხინვალის რეგიონის ტერიტორიაზე 58-ე რუსული არმიის 250-მდე ერთეული მძიმე ტექნიკა სწორედ როკის გვირაბით შემოიჭრა.
