ბინათმესაკუთრეთა ამხანაგობებზე 28 მილიონი იხარჯება, რაც ეფექტიანი არ არის-კახა კალაძე

ბინათმესაკუთრეთა ამხანაგობებზე 28 მილიონი იხარჯება, რაც ეფექტიანი არ არის-კახა კალაძე

დედაქალაქის მერმა კახა კალაძემ მერის მოადგილე ილია ელოშვილს დაავალა, რომ ბინათმესაკუთრეთა ამხანაგობების დაფინანსების სისტემის არსებული ფორმა და მისი ფუნქციები გადაიხედოს.

როგორც დედაქალაქის მერმა მთავრობის დღევანდელ სხდომაზე განაცხადა, აღნიშნული მიმართულებით პრობლემები არსებობს.

„მგონია, რომ აქ ჩვენ პრობლემები გვაქვს. ამ მიმართულებით, დაახლოებით, 28 მილიონი ლარი იხარჯება, რაც მგონია, რომ ეფექტიანი არ არის. პრობლემები გამჭვირვალობის თვალსაზრისითაც არსებობს. ამიტომ ბატონ ილია ელოშვილს მინდა დავავალო, რომ მოხდეს ამ ინსტიტუციისა და მისი ფუნქციების ახლებურად გააზრება, რათა განვითარდეს ის, როგორც მუნიციპალიტეტისა და მოსახლეობის თანამშრომლობის ინსტიტუტი“, – განაცხადა კახა კალაძემ.

მისივე თქმით, სისტემის არსებული ფორმის ახლებურად ჩამოყალიბება მოსახლეობისთვის მნიშვნელოვანი პროექტების განხორციელების შესაძლებლობას იძლევა.

„რაც მთავარია, ეს ყველაფერი უნდა იყოს გამჭვირვალე. მიმაჩნია, რომ ამ მიმართულებით, ძალიან ბევრ სასიკეთო და მნიშვნელოვან პროექტებს განვახორციელებთ“, – აღნიშნა კალაძემ.

კატეგორიები: საზოგადოება

კომენტარები

მსგავსი სიახლეები